លោកអ្នកនាងខ្លះប្រាកដជាបានដឹងឮតាមរយៈការអានព័ត៌មាន ឬការផ្សព្វផ្សាយផ្សេងៗ អំពីភាពល្បីល្បាញរបស់ជនបរទេសមួយចំនួន ដែលបានលះបង់ទាំងកម្លាំងកាយចិត្ត និងទ្រព្យសម្បត្តិ ជួយដល់ប្រជាជនកម្ពុជា។ ក្នុងចំណោមអ្នកទាំងនោះ Cambonomist សូមលើកយកជនបរទេស ០៣រូប ដែលមានភាពលេចធ្លោជាងគេ ក្នុងការជួយដល់ប្រជាជនខ្មែរ និងសង្គមខ្មែរ។
1) លោកវេជ្ជបណ្ឌិត បេអាត រីច្ឆន័រ (Beat Richner)
ស្ថាបនិកមន្ទីរពេទ្យគន្ធបុប្ផា វេជ្ជបណ្ឌិត បេអាត រីច្ឆន័រ កើតនៅថ្ងៃទី១៣ ខែមីនា ឆ្នាំ១៩៤៧។ លោកទទួលសញ្ញាបត្រវេជ្ជបណ្ឌិតនៅឆ្នាំ១៩៧៣ ជាមួយនឹងឯកទេសព្យាបាលកុមារ នៅមន្ទីរពេទ្យកុមារ នៅទីក្រុងហ្ស៊ុយរិច ប្រទេសស្វ៊ីស។
ឆ្នាំ១៩៧៤/៧៥ កាកបាទក្រហមស្វ៊ីស បានបញ្ជូនគាត់មកធ្វើការនៅមន្ទីរពេទ្យ គន្ធបុប្ផា នៅរាជធានីភ្នំពេញ។ ប៉ុន្តែ របបខ្មែរក្រហម បានធ្វើឲ្យគាត់បង្ខំចិត្តត្រឡប់ទៅប្រទេសស្វ៊ីសវិញ នៅឆ្នាំ១៩៧៥។
ឆ្នាំ១៩៩២ លោកវេជ្ជបណ្ឌិត បេអាត រីច្ឆន័រ បានវិលត្រឡប់មកប្រទេសកម្ពុជាវិញ ដោយបានកសាងឡើងវិញ និងពង្រីកគន្ធបុប្ផា ចាប់តាំងពីពេលនោះមក។ ចាប់តាំងពីឆ្នាំ១៩៩២មក លោក បេអាត រីច្ឆន័រ បានបង្កើតនិងដំណើរការមន្ទីរពេទ្យចំនួន ០៥ នៅរាជធានីភ្នំពេញ និងនៅខេត្តសៀមរាប។
នៅរាជធានីភ្នំពេញ មន្ទីរពេទ្យ គន្ធបុប្ផា មានចំនួន ៤ គឺ គន្ធបុប្ផា ១ កសាងនៅឆ្នាំ១៩៩២, គន្ធបុប្ផា ២ កសាងនៅឆ្នាំ១៩៩៦, គន្ធបុប្ផា ៣ កសាងនៅឆ្នាំ២០០៥ និង គន្ធបុប្ផា ៤ កសាងនៅឆ្នាំ២០០៧។ នៅខេត្តសៀមរាប លោកវេជ្ជបណ្ឌិត បេអាត រីច្ឆន័រ បានកសាងនិងដំណើរការមន្ទីរពេទ្យមួយ ឈ្មោះ មន្ទីរពេទ្យ ជយវរ្ម័ន ទី៧ ដែលមន្ទីរពេទ្យកសាងនៅឆ្នាំ១៩៩៩។
ក្នុងរយៈពេលជាង ២៤ឆ្នាំនេះ មន្ទីរពេទ្យគន្ធបុប្ផា និងមន្ទីរពេទ្យ ជយវរ្ម័ន ទី៧ បានផ្ដល់ការព្យាបាលមិនសម្រាកដល់អ្នកជំងឺ ១៤.៨៣៧.១៥៥នាក់ អ្នកជំងឺសម្រាកព្យាបាលបាន ១.៥១៦.៤៧១នាក់ ពិនិត្យផ្ទៃពោះបាន ១.៣៩០.៣២៣នាក់ និងសម្រាលកូនបាន ១៩២.៨៩៧នាក់។
2)អ្នកនាង អ៊ែនជែលីណា ចូលី (Angelina Jolie)
តារាភាពយន្តហូលីវូដអ្នកនាង អ៊ែនជែលីណា ចូលី ដំបូងឡើយត្រូវបានខ្មែរមួយចំនួនស្គាល់ដោយសារនាងសម្ដែងនៅក្នុងរឿងកុនហូលីវូដមួយ គឺរឿង Tomb Raider ដែលមានឈុតខ្លះថតនៅប្រាសាទអង្គរវត្តដ៏ល្បីល្បាញរបស់កម្ពុជា កាលអំឡុងដើមទសវត្ស២០០០។
តាំងពីពេលនោះមក តារាភាពយន្តហូលីវូដដ៏ល្បីល្បាញនេះហាក់បានជាប់ជំពាក់ចិត្តជាមួយប្រទេសកម្ពុជា និងប្រជាជនកម្ពុជា។
ឆ្នាំ២០០២ អ្នកនាង អ៊ែនជែលីណា បានសុំកូនខ្មែរមួយរូបចិញ្ចឹម ដោយដាក់ឈ្មោះថា Madox។ តាំងពីពេលនោះមក អ្នកនាងឧស្សាហ៍អញ្ជើញមកប្រទេសកម្ពុជា ដោយបានទិញដីសម្រាប់អភិរក្សព្រៃឈើនៅស្រុកសំឡូត ខេត្តបាត់ដំបង ផងដែរ។ អ្នកនាងត្រូវបានរដ្ឋាភិបាលកម្ពុជាផ្ដល់សញ្ជាតិកម្ពុជាឲ្យ ជាកិច្ចតបស្នងចំពោះគុណបំណាច់របស់អ្នកនាង។
នៅដើមឆ្នាំ២០១៦ អ្នកនាង អ៊ែនជែលីណា បានដឹកនាំថតខ្សែភាពយន្តទាក់ទងនឹងរឿងរ៉ាវសម័យខ្មែរក្រហម ដែលមានចំណងជើងថា «មុនដំបូង ខ្មែរក្រហមសម្លាប់ប៉ាខ្ញុំ» ឬ “First, They Killed My Father” នៅខេត្តបាត់ដំបង ប្រទេសកម្ពុជា។ ហើយកូនប្រុសនាង ឈ្មោះ ម៉ាដុក ដែលមានកំណើតខ្មែរ ក៏ចូលរួមជួយនៅក្នុងផលិតកម្មនេះដែរ។
ក្រៅពីមានអារម្មណ៍ផ្សារភ្ជាប់ជាមួយខ្មែរ យកកូនខ្មែរទៅចិញ្ចឹមធ្វើកូន ជួយដល់ការអភិរក្សព្រៃឈើនៅកម្ពុជា និងថតកុនទាក់ទងនឹងខ្មែរ អ្នកនាង អ៊ែនជែលីណា ចូលី បានជួយធ្វើឲ្យប្រទេសកម្ពុជាត្រូវពិភពលោកស្គាល់កាន់តែច្បាស់ថែមទៀត ពីព្រោះរៀងរាល់ពេលដែលអ្នកនាងធ្វើដំណើរមកកម្ពុជា ឬធ្វើអ្វីមួយទាក់ទងនឹងកម្ពុជា សារព័ត៌មានទូទាំងពិភពលោកចុះផ្សាយរឿងរបស់អ្នកនាង ដោយភ្ជាប់ជាមួយនឹងប្រទេសកម្ពុជា។
3) លោក ស្កុត នីសុន (Scott Neeson)
អតីតប្រធានផ្នែកទីផ្សារនៅហូលីវូដលោក ស្កុត នីសុន មានអាជីពការងារក្នុងវិស័យផលិតកុននៅហូលីវូដ ដ៏ល្បីល្បាញរបស់ពិភពលោក រយៈពេល ២៦ឆ្នាំ មានប្រាក់ខែច្រើនចាយមិនអស់ មានផ្ទះធំ មានឡានទំនើប និងមានទូកកម្សាន្ត។
ប៉ុន្តែ នៅក្នុងអំឡុងដើមទសវត្សឆ្នាំ២០០០ លោក ស្កុត បានមកទស្សនកិច្ចកម្ពុជា។ នៅគ្រានោះ គាត់បានជួបកុមារដើររើសសំរាមនៅស្ទឹងមានជ័យ រាជធានីភ្នំពេញ។
ពេលនោះហើយដែលបានធ្វើឲ្យជីវិតគាត់ប្រែប្រួល។ លោក ស្កុត បានលាលែងពីការងារប្រាក់ខែច្រើន ជីវិតរស់នៅស្រណុកសុខស្រួល មករស់នៅរាជធានីភ្នំពេញ បើកមូលនិធិ និងអង្គការ ជួយកុមាររើសសំរាមនៅស្ទឹងមានជ័យ ឲ្យមានការអប់រំ និងជួយគ្រួសារពួកគេឲ្យមានជីវភាពសមរម្យ។
ថ្មីៗនេះ លោក ស្កុត នីសុន បានកសាងសាលារៀនធំមួយ នៅសហគមន៍ស្ទឹងមានជ័យ ផ្ដល់ការអប់រំដល់កុមារកាន់តែច្រើននាក់។
យើងមិនអាចរៀបរាប់អស់សេចក្ដីសមល្មមនឹងអ្វីដែលពួកគាត់ទាំងបីរូបខាងលើ បានជួយដល់ពលរដ្ឋខ្មែរ និងសង្គមខ្មែរ។ យើងគ្រាន់តែសង្ឃឹមថា រឿងរ៉ាវរបស់ពួកគាត់នឹងជំរុញទឹកចិត្តដល់ប្រជាជនខ្មែរ ជាពិសេស សេដ្ឋីនៅកម្ពុជាជួយដល់ពលរដ្ឋខ្មែរជាជនរួមជាតិរបស់ខ្លួនឲ្យបានកាន់តែច្រើនថែមទៀត៕
4) លោក Christian ស្ថាបនិកអង្គការ PSE (POUR UN SOURIRSD’ENFANT)
ក្នុងឆ្នាំ ១៩៩៥ Christian និង Marie-France des Pallières បានមកបំពេញបេសកកម្មមនុស្សធម៌នៅប្រទេសកម្ពុជា ក្រោយពេលដែលអ្នកទាំងពីរបានចូលនិវត្តន៍នៅប្រទេសបារាំង។ ប៉ុន្តែមួយថ្ងៃមុនពេលអ្នកទាំងពីរចេញទៅមានក្មេងប្រុសតូចគួរឱ្យអាណិតម្នាក់នៅតាមដងផ្លូវបានបង្ហាញប្រាប់ពីកន្លែងដែលគាត់រស់នៅ។ នេះជាអ្វីដែលអ្នកទាំងពីរបានឃើញកន្លែងចាក់សំរាមដ៏សំខាន់នៅជាយក្រុងរាជធានីភ្នំពេញ ហើយក៏ឃើញកុមារកម្ពុជាច្រើនកំពុងរស់នៅគួរឲ្យអាសូរ។
លោក Christian និងភរិយា Marieមានការតក់ស្លុតយ៉ាងខ្លាំងចំពោះអ្វីដែលបានឃើញហើយក៏ផុសគំនិតមួយគិតថា «អ្នកមិនអាចមើលឃើញរឿងបែបនេះហើយបន្តរស់នៅយ៉ាងមានក្ដីសុខ បែបនេះបានទៀតទេ»។
ក្រោយមកពីរនាក់ប្ដីប្រពន្ធខាងលើក៏បានលះបង់រឿងគ្រប់យ៉ាងទាំងអស់ ដែលនៅពីក្រោយខ្នង ហើយចាប់ផ្ដើមជីវិតថ្មីមួយនៅរាជធានីភ្នំពេញ ក្នុងក្ដីសង្ឃឹមមួយថានឹងមិនឲ្យស្ថានភាពបែបនេះកើតឡើងចំពោះកុមារកម្ពុជាទៀតទេ។ បន្ទាប់មកអ្នកទាំងពីរបានយកប្រាក់កាសសល់ពីការសន្សំទិញអាហារឆ្ងាញ់ៗ និងចាប់ផ្ដើមផ្ដល់ជំនួយជាលើកដំបូងដល់កុមារនៅកន្លែងចាក់សំរាម។
ក្នុងឆ្នាំ១៩៩៦ លោក Christian និងភរិយា ចាប់ផ្ដើមជួលអគារមួយ និងផ្ដល់កន្លែងស្នាក់នៅដល់កុមារតូចៗចំនួន 60 នាក់។ រហូតមកដល់បច្ចុប្បន្ននេះមានសិស្សជាង ៧០០០នាក់ មានអាយុពី៦ ដល់ ២០ឆ្នាំត្រូវបានចុះឈ្មោះចូលរៀននៅក្នុងសាលា PSE ។ នេះបើតាមគេហទំព័រផ្លូវការរបស់សាលាមួយនេះ។
PSE គឺកើតឡើងចេញពីបេះដូង និងមនោសញ្ចេតនា មិនអាចកាត់ថ្លៃបានរបស់ប្ដីប្រពន្ធជនជាតិបារាំងមួយគូនេះ។ អ្នកទាំងពីរបានរៀបការរយៈពេលជាង ៥០ឆ្នាំមកហើយ និងមានកូនពេញវ័យចំនួនបួននាក់។ ប៉ុន្តែគួរឱ្យសោកស្ដាយលោកកChristian បានស្លាប់បាត់បង់ជីវិតទៅហើយដោយជរាពាធ។
សាលាPSE គឺជាអនុស្សាវរីយ៍២០ឆ្នាំចុងក្រោយរបស់អ្នកទាំងពីរ ជំនួសឱ្យការចូលនិវត្តន៍ដ៏សុខសាន្តនៅបារាំង៕
0 Comments