ខេត្តកំពតជាទីកន្លែងដ៏ពេញនិយមបំផុត សម្រាប់ថ្ងៃឈប់សម្រាក ព្រោះតែខេត្តមួយនេះមានកន្លែងដើរលេងជាច្រើនរៀបរាប់ស្ទើរតែមិនអស់ ។ មានត្រឹមតែ ២០ ម៉ឺនចង់ទៅដើរលេងនៅកំពតអាចស្នាក់នៅបានប៉ុន្មានថ្ងៃ ហើយដើរលេងបានប៉ុន្មានកន្លែង ? តទៅនេះគឺជាការបង្ហាញអំពីការចំណាយក្នុងដំណើរកម្សាន្តនៅកំពត ដោយដកចេញថ្លៃធ្វើដំណើរ ពោលគឺគិតតែក្នុងរយៈពេលដែលឈានដល់ទឹកដីមួយនេះប៉ុននោះ ហើយជាចំណាយសម្រាប់មនុស្សតែម្នាក់ ។
១. ការចំណយលើថ្លៃគេង ប្រសិនបើចេញពីភ្នំពេញទៅពីព្រឹក យើងអាចទៅដល់ខេត្តកំពតត្រឹមម៉ោង ១១ ឬ ១២ ថ្ងៃត្រង់ ទៅដល់ភ្លាមគួររកកន្លែងស្នាក់នៅក្នុងក្រុងកំពតសិន ព្រោះយើងមិនទៅគេងនៅរីសត ឬ បោះតង់ឡើយ ដើម្បីទុកដាក់អីវ៉ាន់ ។ ផ្ទះសំណាក់ធម្មតាម៉ាស៊ីនត្រជាក់តម្លៃចាប់ពី ១២ ឡើងក្នុងមួយយប់ទៅតាមប្រភេទផ្ទះ ឬ បន្ទប់ ។ សម្រេចថាយើងចំណាយលើថ្លៃបន្ទប់អស់ ១២ ដុល្លារ លើថ្លៃគេង ដូច្នេះយើងសល់ ៣៨ ដុល្លារទៀតដើម្បីដំណើរកម្សាន្ត ថ្ងៃទី ១ ។
២. ដំណើរកម្សាន្តថ្ងៃទី ១ ក្រោយងូតទឹករៀបចំខ្លួនជាពេលវេលាសម្រាប់ទទួលទានអាហារថ្ងៃត្រង់ យើងមានជម្រើសបីជ្រើសរើសទី ១ ញ៉ាំបាយថ្ងៃនៅផ្សារកំពត ២. ទិញពីផ្សារយកទៅញ៉ាំនៅកន្លែងដើរលេង ៣. ទៅទិញញ៉ាំនៅកន្លែងដើរលេង ។ យើងសម្រេចថា ញ៉ាំឱ្យហើយតែម្ដងកុំឱ្យស៊ាំញ៉ាំច្រើន យ៉ាងច្រើនអស់ត្រឹម ១ ឆ្អែតបាត់ទៅហើយ ។ នៅរសៀលថ្ងៃទី ១ នេះយើងអាចទៅលេងនៅជិតៗសិនដូចជា ៖ #ទៅងូតទឹកលេងនៅទឹកឈូរ មានចំងាយប្រមាណតែជាង ៧ គីឡូម៉ែត្រប៉ុនណោះពីក្រុងកំពត យើងអាចទៅងូតទឹកលេងយ៉ាងសប្បាយ ដោយមិនមានត្រូវចំណាយអ្វីឡើយ គ្រាន់តែអស់លើថ្លៃផ្ញើម៉ូតូ ឬ រថយន្តប៉ុនណោះ ។
#ទៅថតរូបលេងនៅស្ពានដែកដងព្រែកកំពត បន្ទាប់ពីងូតទឹកលេងរួច យើងជិះបកត្រឡប់មកក្រុងកំពតវិញ តែនៅតាមផ្លូវកុំឱ្យខាតជើងទេសចរតែងទៅថតរូបលេងនៅស្ពានដែកសម្រាប់រថភ្លើងឆ្លងកាត់ មានទេសភាពស្អាតខ្លាំង ពិសេសពេលរសៀលដែលព្រះអាទិត្យចាប់ផ្ដើមរកលិច ។
#ជិះទូកមើលទេសភាពថ្ងៃរៀបលិច និង មើលអំពិលអំពែកនៅដងព្រែកកំពត ពេលរសៀលការជិះទូកមើលថ្ងៃរៀបលិច និង អំពិលអំពែកគេកម្ររំលងណាស់ ព្រោះមិននៅឯណាឆ្ងាយឡើយ គឺនៅដងព្រែកកំពតក្នុងក្រុងតែម្ដង ។ ថ្លៃទូកម្នាក់ ៣ ដុល្លារ នៅលើទូកមានលក់អាហារ និង ភេសជ្ជៈគ្រប់មុខយើងអាចញ៉ាំឱ្យហើយសម្រាប់អាហារពេលល្ងាចក៏បាន ។ សរុបទាំងថ្លៃទូក និង អាហារអាចថាអស់ត្រឹម ៦ ដុល្លារប៉ុនណោះ ។ ដូច្នេះសរុបការចំណាយថ្ងៃដំបូងយើងត្រូវចំណាយអស់ប្រមាណតែ ២២ ដុល្លារប៉ុនបូកទាំងថ្លៃទិញទឹកសុទ្ធ និង ថ្លៃផ្ញើម៉ូតូ ។
៣. ដំណើរកម្សាន្តថ្ងៃទី ២ យើងនៅសល់លុយ ២៨ ដុល្លារទៀតដើម្បីដើរលេង ។ យើងត្រូវយកអីវ៉ាន់ចេញពីផ្ទះសំណាក់ឱ្យហើយដាក់តាមខ្លួនតែម្ដង ។ ស្រស់ស្រូបអាហារពេលព្រឹកអស់ ២ ដុល្លារយ៉ាងច្រើន រួចត្រូវបន្តដំណើរជាច្រើនកន្លែងដូចជា ៖
#ទៅចំការទុរេន យើងទៅទស្សនាចំការទុរេនដើម្បីឱ្យឃើញផ្ទាល់ភ្នែកទិដ្ឋភាពដាំដុះ និង ផលដំណាំទុរេន ។ ប្រសិនបើចង់ទិញញ៉ាំសូមគិតគូរខ្លួនឯង «ប្រជាប្រិយ» អត់បូកថ្លៃទុរេនឱ្យទេ ។ #ទៅលេងរមណីយដ្ឋានសម្បូរព្រៃចាក តាមពិតរមណីយដ្ឋាននៅកំពតច្រើនណាស់តែយើងសុំទៅលេងជិតៗ ។ តាមផ្លូវទៅរមណីដ្ឋានទឹកឈូរ យើងនឹងឃើញស្លាកមួយនៅខាងស្ដាំដៃដាក់រមណីយដ្ឋានសម្បូរព្រៃចាក ចុះពីផ្លូវប្រមាណតែ ៥០០ ម៉ែត្រយើងនឹងឃើញហើយ ។
#ទៅលេងនៅរមណីយដ្ឋានដូងទេ ចេញពីព្រៃចាកយើងទៅដូងទេ នៅទីនោះយើងអាចងូតទឹកលេង មានឧបករណ៍រំអិលចូលទឹក មានដើមដូងស្អាតៗ មានឆ្នេរខ្សាច់មិនចាញ់នៅព្រះសីហនុឡើយ ។ #ទៅអុំទូកលេងនៅឧទ្យានដងព្រែក ជាកន្លែងកម្សាន្តល្បីល្បាញខ្លាំងនៅកំពត បើចង់ជួលទូកអុំលេងអស់តែ ៥ ដុល្លារទេ បើចង់ជិះខ្សែរ៉ត អស់ ៧ ដុល្លារ ។ បើចង់តែស្គាល់គ្រាន់តែទៅមើលក៏បាន តែកុំឱ្យខាតជើងអុំទូកលេងទៅព្រោះសប្បាយណាស់ ។
#បន្តទៅត្រពាំងសង្កែរ រៀងរសៀលបន្តិចហើយយើងក៏ដើរលេងហត់ដែរ ល្មមដល់ពេលត្រឡប់ទៅភ្នំពេញវិញហើយ តែកុំឱ្យខាតជើងឆៀងចូលលេងនៅត្រពាំងសង្កែរទៅ ទេសភាពស្អាតណាស់ មានព្រៃកោងកាង ទឹកព្រែកដ៏ស្អាតបំផុត ។ សរុបការចំណាយថ្ងៃទី ២នេះអស់ប្រហែល ២២ ដុល្លារដូចថ្ងៃទី ១ ដែរ ។ ដូច្នេះលុយត្រឹមតែ ៥០ ដុល្លារ ឬ ២០ ម៉ឺនរៀលដើរលេងមួយយប់មួយថ្ងៃនៅកំពតមិនអស់ផង ។យ៉ាងណាក្ដីនេះគ្រាន់តែជាការចែករំលែកបទពិសោធន៍ពីអ្នកដែលឧស្សាហ៍ទៅលេងប៉ុនណោះ ប្រិយមិត្តអាចចាយអស់លើសនេះអាស្រ័យលើធនធានរបស់ខ្លួន ៕
0 Comments